Deg tmeddurt-nneɣ n yal ass, ama deg beṛṛa, ama deg leqdic, la nettwali amek ay la yetthuddu, inegger akk wayen ay yettarran tameddurt-nneɣ temɛen. Am waṭas n medden, ula nekkni la nessaram ad nqabel lmuja-a ay yetthuddun kra n wayen yesɛan lmeɛna deg tmeddurt-nneɣ, nessaram ad nezmer ad nqabel uguren ayyes d-yegla waya ass-a.

Tazzla-a ay la tettazzal tmeddurt-nneɣ ass-a ɣer uxeṣṣar tusa-d ɣef ljal n wayen ay tetteg yiwet n tegrawt d tamecṭuḥt n wid ay aɣ-iḥekmen, d wid ay yemlek laẓ n wedrim akked weskunner n lerbaḥ, wid ay yebɣan ad yili akk udabu gar yifassen-nsen. “Tugdut aydeg ara ttekkint akk tegrawin n wegdud” akked tegrawliwin ay la d-yettilin ussan-a ur ttṛuḥunt ɣer lbeɛd. Medden ur zemmren ad frun uguren-nsen n tidet arma d asmi ara d-akin yerna amur ameqran seg-sen ad ttekkin deg leqdic i lmend n ussebded n umaḍal aydeg ara telhu tmeddurt, yerna ad tdum deg-s talwit. Wid ay yessaramen tilelli ass-a, yessefk fell-asen ad qedcen i lmend n ubeddel seg yiẓuran, yerna, i lmend n waya, timetti, terra-tt tmara ad tbeddel iman-nnes, d abeddel aydeg ara ttekkin akk iɛeyyalen-nnes.

Nekkni nebɣa tugdut n tidet, d tin ara d-yawey weɣref, d tin aydeg d aɣref ara yeqqlen d bab n ṛṛay, d netta ara yeddmen ṛṛay yerna ad yeddem ṛṛay ara yeffɣen fell-as, d win ara yeddun akked tmetti-nnes. Tugdut am ta teḥwaj imdanen ay izemren ad qadren leqwanen, ad ten-agin, ad ten-sqecren yerna ad d-snulfun leqwanen iwutan ama i tmetti, ama i yiman-nsen. Ur d targit ay la nettargu akken ad nerr amaḍal d ljennet aydeg ur yettili ccwal, wanag nebɣa ad d-nessebded taɣerma tilellit, d tin aydeg yal yiwen ad yettuqader, d tin aydeg lumuṛ tteddun s ṛṛay n lɛali aydeg ur yettwaḍlam yiwen. S waya, nekkni nebɣa ad d-nessebded timetti ara izemren, nettat s timmad-nnes, ad tessers tilisa i yiman-nnes, s webrid n ṣṣwab, d timetti ara yemsebḍun s tidet ɣef tesnakta (idéologie) ay tt-iḥekmen ass-a. Asurif amezwaru netta d tiririt n tmeddurt i kra n wansayen ay mazal ddren deg tmura “tigunẓa [sous-développées]” : tamsetlelt (solidarité), beḍḍu n lxir gar medden, amɛawen, tammidwa (amitié), lxir i ubeṛṛani, tezdeg n nneyya. D wi akk ay d llsisan i lmend n ussebded n tmetti yelhan.

Yessefk ad neg ayen yessefken akken ad nerr timetti tettḥadar deg temsal n tussna akked teknussna (technologie), yerna tettett s lmizan i wakken ur tessamas tawennaḍt, am wakken ara tili d timetti yesseqdacen lmizan n uxemmem deg wayen yerzan timsal n tmurt. Taɣawsa tawḥidt ara ireglen abrid i wid yeffuden leḥkem nettat d assebded n yegrawen ara yesɛun tazmert akken ad ddmen ṛṛay, d igrawen ay izemren ad ttwafesxen, imḍebbren-nsen zemren ad ttuḥasben yerna tettili-d deg-sen nnuba deg leḥkem. Taɣawsa tawḥidt ay izemren ad tergel abrid i rrbeḥ war tilisa netta d assebded n tgadda (aɛdal) deg lexlaṣ n medden, akked uɛawed n tmuɣli deg wamek ay myezwarent tɣawsiwin ay ḥwajen medden. Ti ur llint d tiɣawsiwin n menwala, ur llint d tiɣawsiwin ayɣef nezmer ad nerwel, am wakken ur llint d tiwezɣiyin : ibeddilen imeqranen am wi llan-d yagi deg umezruy.

Nekkni numen s usenfar (projet) ay yettarran medden zemren i yiman-nsen, d win ay d-ilulen seg leqrun-nni n yimneɣiyen mgal kra n wayen ay d-yettuḥettmen sɣur udabu abeṛṛani ɣef weɣref : ansayen, agama, tussna, ssuq neɣ akabar. Leqdic-a ilul-d deg Legrig Taqburt, iɛawed yennulfa-d deg Tuṛuft Tutrimt (taɣerbit). Asenfar-a bdan qeddcen fell-as deg tallit n Tleslalit (renaissance), deg Lqern n Teftilin, deg Tegrawla Tafṛensist n 1789, deg umussu n yiqeddacen, deg yimenɣiyen ay d-yellan i lmend n tririt n tlelli i tmura yeddren ddaw tehrest (listiɛmaṛ), deg yimenɣiyen i lmend n tlelli n tmeṭṭut, n yilemẓiyen, n tdersiyin akked uḥuddu n twennaḍt. D acu kan, asenfar-a ay yekkaten i lmend n tgadda (aɛdal) akked lḥeqq, ass-a qrib ad yemmet, imi Amaḍal utrim (aɣerbi) yesnulfa-d taɣawsa niḍen : yesseqdac ṣṣwab n tkellax akken ad iḍellel medden, yerna aḍellel-a iḥuza, ass-a, akk idisan n tmeddurt-nneɣ.

Iswi n tegrawt-nneɣ netta d tiririt n tmeddurt i usenfar-a ara yerren medden zemren i yiman-nsen, yerna ad t-nerr d asenfar n tmetti n tidet. Neḥwaj s lḥir ad nesɛu tagrawt n wallaɣen ara iqedcen lwaḥid akken ad xemmemen amek ara d-afen tifratin, amek ara ssiwḍen izen-nneɣ aserti ed wamek ara d-ilint tifratin deg wenrar. Iɣallen ay izemren ad ɛawnen asenfar-a mazal-iten mfuzraɛen), yerna aṭas seg-sen ur ukin s ljehd n tmussni-nsen ed wayen ay zemren ad t-gen. Anadi-nneɣ i wakken ad nerr amdan ed tmetti zemren i yiman-nsen d win ay yeḥwajen leqdic deg wenrar, leqdic yettkemmilen, leqdic ur ifecclen ula ma llan wuguren, d win ara d-yilin deg tmeddurt n yal ass, d win ara yaẓen s wesdukkel n yiɣallen-nneɣ.

Amazday n Lieux Communs

Tasuqilt sɣur Omar Mouffok - Tlaxcala, Aẓeḍḍa n yemsuqqlen i lmend n uṭṭuqqet n yilsawen - http://www.tlaxcala-int.org